اخت اتودع اخوتها -- شلون اتصير حالتها
باچر بالحزن والهم -- ورماد الخيم والدم
شلون اتصير حالتها
--------------------
هذا اليل خويه حسين شيخبرك
انه اختك وصبري من عزم صبرك
وعمر اختك يخويه من على عمرك
يمصباح النوايب لايطر فجرك
ليل ومامثل هاليل -- موادع والدموع اتسيل
ميظل لاشمل ملتم -- ورماد الخيم والدم
------------------------------
ظل اظلم يليل الفجر منريده
ولا تفجع حسين ابذبحة اوليده
اخويه ايموت حتى اليرتضع بيده
عبد الله السهم من يگطع اوريده
ورمله حظنته الجسام -- سهرانه وبعد متنام
ودمع العين يتكلم -- ورماد الخيم والدم
--------------------------
لايسلم رضيع ولاخدر النه
وچفوف الگمر يتگطعن منه
وعلي الاكبر سيوف اعداه يولنه
وساعات المحن مدري شيراونه
الاكبر ماتشوفه العين -- باچر بالمحن يحسين
ونته بهل المحن تعلم -- ورماد الخيم والدم
------------------------
تعلم باليصير اعلينه واليجري
واليله انشدك حسرتي ابصدري
آنه امخدره لو ينسلب خدري
يحسين وبعد شيفيدني عمري
شلي بالعمر بعدك -- لوباچر صرت وحدك
واعلينه العدو اتقدم -- ورماد الخيم والدم
----------------------------
من يهتم يخويه حسين بعيلك
اليله امأمنه يبن الابو ابجالك
لوحز منحرك يحسين چتالك
وعباس الذي ماعاد لطفالك
خويه اخلافك بياحال -- اطفال وحرم وعيال
بعيالك منو اليهتم -- ورماد الخيم والدم
-------------------------
خويه حسين اختك رايده اتشمك
وتقَبلَك تريد إوصيه من امك
وهذا اليل مانامه اظل يمك
اشوفه اچبير صاير هالمسه همك
اتوصي اختك بالوصيَه -- صبر امنين ظل بيه
من هاليل يتهدم -- ورماد الخيم والدم
................................
الخميس فبراير 07, 2008 8:15 pm
